---------- முகுந்தமுரளி

கடந்த சில மாதங்களாக யுக்ரைன்-ரஷ்ய எல்லையில் போர்ப் பதற்றம் நீடித்துவருகிறது. இரு நாடுகளின் எல்லைகளுக்கு அருகே ரஷ்ய துருப்புக்கள் குவிக்கப்பட்டுள்ளமை, மாஸ்கோ ஒரு படையெடுப்பைத் தொடங்கக் கூடும் என்ற அச்சத்தைத் தூண்டுகின்றன. இதன் நிலையை ஒரளவு விளக்குவதே இக்கட்டுரை. 

யுக்ரைனும் அதன் எல்லைகளும்                                                                                                  கிழக்கு ஐரோப்பாவில் உள்ள ஒரு நாடான யுக்ரைன், 1990கள் வரை சோவியத் ஒன்றியத்தின் ஓர் உறுப்பு நாடாகத்தான் இருந்தது. பின்னர் 1991 இல் சோவியத் சிதைந்தபோது, சுதந்திரம் பெற்று தனி நாடாக தங்களுக்கென புதிய அரசமைப்புச் சட்டத்தோடு செயல்பட்டு வருகிறது. 

யுக்ரைனின் எல்லைகளாக வடகிழக்கே ரஷ்யா வடக்கே பெலாரஸ்; மேற்கே போலந்து, செலோவாக்கியா, ஹங்கேரி தெற்கே ருமேனியா, மல்தோவா, கருங்கடல் ஆகியனவும் அமைந்துள்ளன. கிரிமியா தீபகற்பம் உட்பட யுக்ரைனின் மொத்தப் பரப்பளவு 603,628 கிமீ² ஆகும். ஆனால் இந்தக் கிரிமியா தீபகற்பத்தை 2014இல் ரஷ்யா தன்னுடன் இணைத்துக்கொண்டது.  யுக்ரைன் ஐரோப்பாவில் மிகப் பெரிய நாடாகவும், உலகின் 46-வது பெரிய நாடாகவும் உள்ளது. கிரிமியா தவிர்த்து, யுக்ரைனின் மக்கள் தொகை 42 மில்லியன் ஆகும். இது உலகின் 32-வது அதிக மக்கள்தொகை கொண்ட நாடாகும். கெய்வ் இதன் தலைநகரும், மிகப்பெரிய நகரமும் ஆகும். இதன் ஆட்சி மொழி யுக்ரைனியம் ஆகும். பெரும்பான்மை மக்கள் கிழக்கு மரபுவழிக் கிறித்தவர்கள் ஆவர்.

இப்போதும் யுக்ரைன் தன் எல்லைகளை ரஷ்யாவோடும், ஐரோப்பிய ஒன்றியத்தோடும் பகிர்ந்து கொள்கிறது. ஆனால் கலாசார ரீதியிலும் சமூக ரீதியிலும் ரஷ்யாவோடு பல தொடர்புகளை யுக்ரைன் கொண்டுள்ளது. இப்போதும் ரஷ்ய மொழி பேசுவோர் கணிசமாக யுக்ரைனில் வாழ்ந்து வருகின்றனர். 

யுக்ரைனுக்கும் ரஷ்யாவுக்கும் இடையிலான மோதலின் வரலாறு    

                                                            இரண்டு முன்னாள் சோவியத் நாடுகளான யுக்ரைனுக்கும் ரஷ்யாவிற்கும் இடையிலான பதற்றங்கள், 2013 இன் பிற்பகுதியில் ஐரோப்பிய ஒன்றியத்துடனான ஒரு முக்கிய அரசியல் மற்றும் வர்த்தக ஒப்பந்தத்தின் காரணமாக அதிகரித்தன. ரஷ்ய சார்பு அப்போதைய ஜனாதிபதி, விக்டர் யானுகோவிச், பேச்சுக்களை இடைநிறுத்தியதை அடுத்து மாஸ்கோவின் அழுத்தத்தின் கீழ், கெய்வில்  பல வாரங்களாக நடந்த போராட்டங்கள் வன்முறையாக வெடித்தன.

பின்னர், மார்ச் 2014இல், ரஷ்யா தனது நலன்களையும் ரஷ்ய மொழி பேசும் குடிமக்களின் நலன்களையும் பாதுகாக்கிறது என்ற சாட்டில், வலுவான ரஷ்ய விசுவாசத்துடன் தெற்கு யுக்ரைனில் உள்ள தன்னாட்சி தீபகற்பமான கிரிமியாவை இணைத்தது. முதலில், ஆயிரக்கணக்கான ரஷ்ய மொழி பேசும் துருப்புக்கள், ‘சிறிய பச்சை மனிதர்கள்’ என்று அழைக்கப்பட்டு, பின்னர் மாஸ்கோவால் ரஷ்ய வீரர்கள் என்று ஒப்புக் கொள்ளப்பட்டு, கிரிமியன் தீபகற்பத்தில் குவிக்கப்பட்டது. சில நாட்களுக்குள், யுக்ரைன் மற்றும் உலகின் பெரும்பாலான நாடுகளால் சட்டத்திற்குப் புறம்பானது என்று குற்றம் சாட்டப்பட்ட ஒரு வாக்கெடுப்பில் ரஷ்யா அதன் இணைப்பை நிறைவு செய்தது. யுக்ரைனின் மற்ற பகுதிகளுக்கு தெற்கே அமைந்துள்ள கிரிமியன் தீபகற்பம், தற்பொழுது ரஷ்ய பிரதான நிலப்பகுதியுடன் சாலைப் பாலம் மூலம் இணைக்கப் பட்டுள்ளது. சமகாலத்தில் கிழக்கு யுக்ரைனில் கணிசமான பகுதிகளைத் தங்கள் கட்டுப்பாட்டில் வைத்திருக்கும் பிரிவினைவாதிகளுக்கு ரஷ்யா ஆதரவளித்தது. அதனைத் தொடர்ந்து, யுக்ரைனின் டொனெட்ஸ்க் மற்றும் லுஹான்ஸ்க் பிராந்தியங்களில் ரஷ்ய சார்பு பிரிவினைவாதிகள் தங்கள் சுதந்திரத்தை அறிவித்தனர். இது தான் ரூசோ - யுக்ரேனியன் (Russo-Ukrainian) போராக உருவெடுத்தது. 

இது பல மாதங்களாக கடுமையான சண்டையைத் தூண்டியது. பிரான்ஸ் மற்றும் யேர்மனியால் 2015இல் மின்ஸ்கில் சமாதான ஒப்பந்தத்தில் கெய்வ் மற்றும் மாஸ்கோ கையெழுத்திட்ட போதிலும், மீண்டும் மீண்டும் போர் நிறுத்த மீறல்கள் நடந்துள்ளன. புள்ளி விபரங்களின்படி, மார்ச் 2014 முதல் கிழக்கு யுக்ரைனில் பிரிவினைவாதப் போராளிகளுக்கும் உக்ரைன் இராணுவத்துக்கும் இடையிலான போரில் இதுவரை 14,000த்துக்கும் மேற்பட்டோர் உயிரிழந்துள்ளனர். போர் தொடர்ந்து கொண்டுதான் இருக்கிறது.

கிரிமியா மற்றும் கிழக்கு யுக்ரைனில் ரஷ்யாவின் நடவடிக்கைகளுக்கு விடையிறுக்கும் வகையில் ஐரோப்பிய ஒன்றியமும் அமெரிக்காவும் தொடர்ச்சியான நடவடிக்கைகளை விதித்துள்ளன. இதில் தனிநபர்கள், நிறுவனங்கள் மற்றும் ரஷ்யப் பொருளாதாரத்தின் குறிப்பிட்ட துறைகளை குறிவைக்கும் பொருளாதார தடைகள் அடங்கும். யுக்ரைன் நாட்டின் கிழக்கில் பதற்றத்தைத் தூண்டுவதாகவும் மின்ஸ்க் போர் நிறுத்த ஒப்பந்தத்தை மீறியதாகவும் கிரெம்ளின் குற்றம் சாட்டுகிறது.

எல்லையில் என்ன நிலைமை?

அமெரிக்காவும் நேட்டோவும் யுக்ரைன் மற்றும் அதைச் சுற்றியுள்ள துருப்புக்களின் நகர்வுகள் மற்றும் குவிப்புகளை ‘வழக்கத்திற்கு மாறானவை’ என்று விவரித்துள்ளன.

கடந்த மாதம் அமெரிக்க உளவுத்துறை ஆய்வறிக்கைகள், அமெரிக்க ஜனாதிபதி ஜோ பைடன் மற்றும் ஐரோப்பிய தலைவர்களின் எச்சரிக்கைகள் இருந்தபோதிலும், புடின் ஒரு படையெடுப்பை முன்னெடுத்துச் சென்றால் கடுமையான விளைவுகளை சந்திக்க நேரிடும் என்றும் யுக்ரேனிய எல்லையில் 100,000 ரஷ்ய துருப்புக்கள் குவிக்கப்பட்டுள்ளனர் என்றும் ரஷ்யா யுக்ரைனில் ‘2022 இன் தொடக்கத்தில்’ இராணுவத் தாக்குதலைத் தொடங்கலாம் என்று மதிப்பிட்டுள்ளது. 

இம்மாதம் 19 அன்று கெய்வில் (யுக்ரைன் தலைநகர்) தனது யுக்ரேனியப் பிரதிநிதியுடன் பேசிய அமெரிக்க வெளியுறவு அமைச்சர் ஆண்டனி பிளிங்கன், ரஷ்யா “அதன் அச்சுறுத்தல்களைத் தூண்டிவிட்டு யுக்ரைனின் எல்லையில் கிட்டத்தட்ட 100,000 படைகளைக் குவித்துள்ளது, இது ஒப்பீட்டளவில் குறுகிய காலத்தில் இரட்டிப்பாகும்" என்றார்.

2021 இன் பிற்பகுதியில், செயற்கைக்கோள் புகைப்படங்கள் ரஷ்யா போர்த்தளபாடங்கள் -- சுயமாக இயக்கப்படும் துப்பாக்கிகள், போர் டாங்கிகள் மற்றும் காலாட்படை சண்டை வாகனங்கள் உட்பட, எல்லையில் இருந்து சுமார் 186 மைல் (300 கிமீ) தொலைவில் உள்ள பயிற்சி மைதானத்தில் நகர்வதை வெளிப்படுத்தியது.

        யுக்ரைன் பாதுகாப்பு அமைச்சின் சமீபத்திய உளவுத்துறை மதிப்பீட்டின்படி, ரஷ்யா இப்போது யுக்ரைனுக்கு அருகே 127,000 துருப்புக்களுக்கு மேல் நிலைநிறுத்தப்பட்டுள்ளது, இதில் சுமார் 21,000 வான் மற்றும் கடல் பணியாளர்கள் உள்ளனர், மேலும் இஸ்கண்டர் செயற்பாட்டு-தந்திரோபாய ஏவுகணைகளை எல்லைக்கு மாற்றியுள்ளனர் மற்றும் நாட்டிற்கு எதிரான அதன் உளவுத்துறை நடவடிக்கையை அதிகரித்துள்ளனர்.

நெருக்கடியைத் தணிக்கும் நோக்கில் ரஷ்யாவிற்கும் மேற்கு நாடுகளுக்கும் இடையில் மூன்று சுற்று இராஜதந்திர பேச்சுவார்த்தைகள் ஒரு தீர்மானத்தை உருவாக்கத் தவறியதை அடுத்து இந்த மதிப்பீடு வந்தது. 

யுக்ரைனில் ரஷ்ய படையெடுப்பு அடுத்த மாதம் அல்லது இரண்டு மாதங்களில் எந்த நேரத்திலும் நிகழலாம் என்று அமெரிக்க அதிகாரிகள் கூறியுள்ளனர். 

ரஷ்யாவின் பல இராணுவத் தளங்கள் பரந்த நாட்டிற்கு மேற்கில் உள்ளன. ரஷ்யாவின் பாதுகாப்பு அமைச்சகம், யுக்ரைன் எல்லையில் அமைந்துள்ள அதன் தெற்குப் பகுதியில் ‘வழக்கமான’ குளிர்கால இராணுவப் பயிற்சிகளை நடத்தி வருவதாகக் கூறியுள்ளது.

இதற்கிடையில், யுக்ரைனின் கிழக்கு டொனெட்ஸ்க் மற்றும் லுஹான்ஸ்க் பகுதிகள் ரஷ்யாவின் எல்லையில், டான்பாஸ் என்று அழைக்கப்படும் பகுதி, 2014 முதல் ரஷ்ய ஆதரவு பிரிவினைவாதிகளின் கட்டுப்பாட்டில் உள்ளது. ரஷ்யப் படைகளும் அப்பகுதியில் உள்ளன, யுக்ரைன் ‘தற்காலிகமாக ஆக்கிரமிக்கப்பட்ட பிரதேசங்கள்’ என்று குறிப்பிடப்படுகிறது. ரஷ்யா அதை மறுத்தாலும், மோதலின் முன் வரிசைகள் ஐந்து ஆண்டுகளில் அரிதாகவே நகர்ந்தன, ஆனால் அடிக்கடி சிறிய அளவிலான மோதல்கள் மற்றும் துப்பாக்கி சுடும் தாக்குதல்கள் நடைபெற்றுள்ளன. ரஷ்யாவிற்கு ஆதரவான பிரிவினைவாதிகளின் நிலையைத் தாக்க யுக்ரேனியப் படைகள் முதன்முறையாக 2021 அக்டோபரில் துருக்கியில் தயாரிக்கப் பட்ட போர் ஆளில்லா விமானத்தை நிலைநிறுத்தியபோது ரஷ்யா கோபமடைந்தது. சமகாலத்தில் ரஷ்யா யுக்ரைனில் தன்சார்பான ஒரு பொம்மை ஆட்சியை நிறுவமுயல்கிறது. அதனை மேற்குலக நாடுகள் கூட்டாக தடுக்க முயல்கின்றன. போர்மேகங்களால் சூழப்பட்டுள்ள இந்நிலப்பரப்புக்கள் உலகப்போராக மாறுமா எனும் கேள்விகைளை உருவாக்கியுள்ளது ரூசோ-யுக்ரேனியன் போர். 

will continue