“நாங்கள் ஆட்சியைப் பெற்றது 5 அல்லது 10 ஆண்டுகளில் வேறு கட்சியிடம் மீண்டும் ஒப்படைப்பதற்காக அல்ல”

– அமைச்சர் வசந்த சமரசிங்க

தேசிய மக்கள் சக்தி அரசாங்கம் ஆட்சியைப் பெற்றது ஐந்து அல்லது பத்து ஆண்டுகளுக்குப் பின்னர் மீண்டும் வேறு அரசியல் கட்சியிடம் ஆட்சியை ஒப்படைப்பதற்காக அல்ல என வர்த்தகம், வாணிபம், உணவுப் பாதுகாப்பு மற்றும் கூட்டுறவு அபிவிருத்தி அமைச்சர் வசந்த சமரசிங்க தெரிவித்துள்ளார்.

நேற்று (23) அனுராதபுரம் பகுதியில் நடைபெற்ற மக்கள் சந்திப்பில் உரையாற்றியபோதே அவர் இதனைத் தெரிவித்தார்.

நாட்டில் எரிபொருள் இல்லாமல், வாகனங்களை இறக்குமதி செய்ய முடியாமல், கடன் தவணைகளை செலுத்த முடியாமல் வங்குரோத்து நிலைக்குத் தள்ளப்பட்டிருந்த நிலையில், கடந்த இரண்டு ஆண்டுகளில் அரசாங்கம் பெருமளவு கடன்களை செலுத்தியுள்ளதாகவும், தற்போது வெளிநாட்டு கையிருப்பில் சுமார் 6.7 பில்லியன் அமெரிக்க டொலர்கள் இருப்பதாகவும் அவர் தெரிவித்தார்.

இதன் மூலம் நாட்டின் பொருளாதாரம் தற்போது ஸ்திரப்படுத்தப்பட்டுள்ளதாகவும் அவர் குறிப்பிட்டார்.

வெளிநாட்டு உறவுகள் இல்லை என அரசாங்கத்தின் மீது விமர்சனங்கள் முன்வைக்கப்பட்ட போதிலும், தற்போது உலகின் பல்வேறு நாடுகளைச் சேர்ந்த தலைவர்கள் மற்றும் பிரதிநிதிகள் இலங்கைக்கு வந்து செல்வதாகவும் அமைச்சர் தெரிவித்தார்.

அத்துடன், அரச சேவையில் காணப்பட்ட பாரிய பிரச்சினைகளைத் தீர்க்கும் வகையில், கடந்த ஒன்றரை ஆண்டுகளில் 110,000 பேரை அரச சேவையில் இணைத்துக்கொள்வதற்கான போட்டிப் பரீட்சைகள் மற்றும் நேர்முகத் தேர்வுகள் நடத்தப்பட்டு வருவதாகவும் அவர் கூறினார்.

தகுதியுடையவர்கள் நிச்சயமாகத் தெரிவுசெய்யப்படுவார்கள் என்றும், மக்களுக்கு வழங்கக்கூடிய அனைத்து வசதிகளையும் அரசாங்கம் வழங்கி வருவதாகவும் அமைச்சர் குறிப்பிட்டார்.

ஊழல் தொடர்பான விசாரணைகள்

ஊழல் செய்தவர்களை கைது செய்வதில் அரசாங்கம் வேகம் காட்டவில்லை என சிலர் விமர்சிப்பதாகக் கூறிய அமைச்சர், முன்னாள் ஜனாதிபதி ரணில் விக்கிரமசிங்க நீதிமன்றத்திற்கு செல்ல வேண்டிய நிலை ஏற்படும் என யாராவது முன்கூட்டியே நினைத்திருப்பார்களா என்றும் கேள்வி எழுப்பினார்.

முன்னாள் ஜனாதிபதி மைத்திரிபால சிறிசேன உள்ளிட்டோர் நீதிமன்றத்திற்கு வருவார்கள் என்றும், முன்னாள் அமைச்சர் எஸ்.எம். ரஞ்சித் சிறைக்குச் செல்வார் என்றும் யாராவது எதிர்பார்த்தார்களா எனவும் அவர் கேள்வி எழுப்பினார்.

மக்கள் தமக்கு மூன்றில் இரண்டு பெரும்பான்மை ஆட்சி அதிகாரத்தை வழங்கியது திருட்டை நிறுத்தவும், ஊழல்வாதிகளுக்கு தண்டனை வழங்கவும், கொள்ளையடிக்கப்பட்ட பொதுச் சொத்துக்களை மீட்டெடுக்கவும் தான் எனவும் அமைச்சர் தெரிவித்தார்.

22ஆவது அரசியலமைப்புத் திருத்தம்

நீதிமன்ற வழக்குகள் தாமதமாக இடம்பெறுவதாக மக்களுக்கு தோன்றக்கூடும் எனக் குறிப்பிட்ட அமைச்சர், வழக்குகள் விரைவாக விசாரிக்கப்படுவதற்கு நீதிமன்றங்கள், நீதிபதிகள் மற்றும் சட்டத்தரணிகளுக்கு தேவையான வசதிகள் வழங்கப்பட வேண்டும் என்றார்.

நாட்டின் நீதிமன்றங்களின் செயற்திறனை அதிகரிப்பதற்காக மேலும் சில நீதவான் நீதிமன்றங்களை அமைத்தல், அனுபவமிக்க நீதிபதிகளுக்கு மேலும் சில காலம் பணியாற்றுவதற்கான வாய்ப்பை வழங்குதல் உள்ளிட்ட விடயங்களை கருத்திற்கொண்டே 22ஆவது அரசியலமைப்புத் திருத்தம் கொண்டுவரப்பட்டுள்ளதாகவும் அவர் தெரிவித்தார்.

நீதிபதிகளின் ஓய்வுபெறும் வயதை மேலும் இரண்டு ஆண்டுகளால் அதிகரிப்பதில் தவறில்லை எனவும் அவர் கூறினார்.

உலகின் சில நாடுகளில் நீதிபதிகளின் ஓய்வுபெறும் வயது 70, 72, 75 என இருப்பதாகவும், சில நாடுகளில் குறிப்பிட்ட வயது வரம்பே இல்லாத நிலையும் காணப்படுவதாகவும் அமைச்சர் சுட்டிக்காட்டினார்.

நீதித்துறையின் சுயாதீனத்தைப் பாதுகாத்துக்கொண்டு, அனைவருக்கும் சமமான அணுகலை வழங்கும் நீதித்துறை அமைப்பை உருவாக்க அரசாங்கம் அதிகபட்ச நடவடிக்கைகளை மேற்கொண்டுள்ளதாகவும் அவர் தெரிவித்தார்.

இறுதியாக, தேசிய மக்கள் சக்தி அரசாங்கம் ஆட்சியைப் பெற்றது ஐந்து அல்லது பத்து ஆண்டுகளில் ஆட்சியை விட்டுக்கொடுப்பதற்காக அல்ல என வலியுறுத்திய அமைச்சர், மக்களின் பிரச்சினைகளைத் தீர்த்து முடிக்கும் போது இலங்கை ஒரு வளமான நாடாக மாறும் என்றும், அந்த நாட்டில் அனைவரும் மகிழ்ச்சியாக வாழ முடியும் என்றும் தெரிவித்தார்.

The post “நாங்கள் ஆட்சியைப் பெற்றது 5 அல்லது 10 ஆண்டுகளில் வேறு கட்சியிடம் மீண்டும் ஒப்படைப்பதற்காக அல்ல” appeared first on LNW Tamil.