2026 ஆகஸ்ட் மாதத்திற்கான இலங்கையின் ஏற்றுமதி செயல்திறனை மதிப்பிடுகையில், மொத்த ஏற்றுமதி வருவாய் 1.60 பில்லியன் அமெரிக்க டொலரை எட்டியுள்ளதுடன், கடந்த ஆண்டின் இதே காலப்பகுதியுடன் ஒப்பிடுகையில் 1.77% வளர்ச்சியை பதிவு செய்துள்ளதாக இலங்கை ஏற்றுமதி அபிவிருத்தி சபையின் தலைவர் மற்றும் பிரதம நிறைவேற்று அதிகாரி மங்கள விஜேசிங்க தெரிவித்துள்ளார்.
அரசாங்க தகவல் திணைக்களத்தில் நேற்று (23) நடைபெற்ற ஊடகவியலாளர் சந்திப்பில் அவர் இதனைத் தெரிவித்தார்.
ஆகஸ்ட் மாதத்தில் சேவை ஏற்றுமதித் துறை 13.97% வளர்ச்சியடைந்து 331.87 மில்லியன் அமெரிக்க டொலராக உயர்ந்துள்ளது. அதேவேளை, பொருட்கள் ஏற்றுமதி மூலம் கிடைத்த வருவாய் 1.27 பில்லியன் அமெரிக்க டொலராக பதிவாகியுள்ளதாக அவர் குறிப்பிட்டார்.
இதன்படி, 2026ஆம் ஆண்டின் முதல் எட்டு மாதங்களில் இலங்கையின் மொத்த ஏற்றுமதி வருவாய் 12 பில்லியன் அமெரிக்க டொலர் எல்லையைத் தாண்டி, 12.01 பில்லியன் அமெரிக்க டொலராக உயர்ந்துள்ளது.
இது 2025ஆம் ஆண்டின் இதே காலப்பகுதியில் பதிவான 11.52 பில்லியன் அமெரிக்க டொலருடன் ஒப்பிடுகையில் 4.26% அதிகரிப்பாகும் என மங்கள விஜேசிங்க மேலும் தெரிவித்தார்.
The post ஆகஸ்ட் மாதத்தில் இலங்கையின் ஏற்றுமதி வருவாய் 1.77% அதிகரிப்பு appeared first on LNW Tamil.
