2019 ஆம் ஆண்டு ஈஸ்டர் ஞாயிறு பயங்கரவாதத் தாக்குதல் தொடர்பாக, அப்போது பிரதமராக இருந்த ரணில் விக்ரமசிங்கவின் கோரிக்கையின் பேரில் அமெரிக்கா மேற்கொண்ட விசாரணை தொடர்பான தகவல்களை தற்போதைய அரசு பெற்றுள்ளதா? இல்லையெனில் அதற்கான காரணம் என்ன? என்று ஐக்கிய தேசிய கட்சி அரசாங்கத்திடம் கேள்வி எழுப்பியுள்ளது.
இது தொடர்பாக வெளியிட்டுள்ள அறிக்கையில், சம்பந்தப்பட்ட விசாரணை அறிக்கைகள் தற்போது அமெரிக்க புலனாய்வு பிரிவு Federal Bureau of Investigation (FBI) மற்றும் அமெரிக்க நீதி திணைக்களம் United States Department of Justice வசம் உள்ளதாக தெரிவிக்கப்பட்டுள்ளது.
அப்போது பிரதமராக இருந்த ரணில் விக்ரமசிங்கவின் கோரிக்கைக்கு அமைவாக, இலங்கையின் குற்றப்புலனாய்வு திணைக்களம் (CID), இராணுவ புலனாய்வு பிரிவு மற்றும் அரச புலனாய்வு சேவை உள்ளிட்ட உள்ளூர் அதிகாரிகளுடன் இணைந்து FBI தாக்குதல் தொடர்பாக விரிவான விசாரணையை மேற்கொண்டதாக அறிக்கையில் குறிப்பிடப்பட்டுள்ளது.
மேலும், 2020 நவம்பர் 12 ஆம் திகதி FBI-யின் சிறப்பு முகவரான Merrilee R. Goodwin அவர்கள் California நீதிமன்றத்தில் 71 பக்கங்களைக் கொண்ட சத்தியப்பிரமாண ஆவணத்தை தாக்கல் செய்ததுடன், 2020 டிசம்பர் 11 ஆம் திகதி Los Angeles நீதிமன்றத்தில் குற்றவியல் வழக்கும் பதிவு செய்யப்பட்டுள்ளதாக ஐக்கிய தேசியக் கட்சி தெரிவித்துள்ளது.
அந்த வழக்கில் பெயரிடப்பட்டிருந்த சில சந்தேகநபர்கள் அந்நேரமே இலங்கை அதிகாரிகளின் காவலில் இருந்ததாகவும், இதன் காரணமாக அமெரிக்க விசாரணை அமைப்புகளும் நீதித்துறை துறையும் சம்பந்தப்பட்ட முக்கிய அறிக்கைகள் மற்றும் ஆதாரங்களை தங்களிடம் வைத்திருப்பதாகவும் UNP தனது அறிக்கையில் குறிப்பிட்டுள்ளது.
அதனால், ஈஸ்டர் தாக்குதல் தொடர்பான அமெரிக்க விசாரணை அறிக்கைகளை தற்போதைய அரசு பெற்றுள்ளதா என்பது குறித்து தெளிவுபடுத்துமாறும், பெறவில்லை என்றால் அதற்கான காரணங்களை வெளிப்படுத்துமாறும் அரசாங்கத்திடம் UNP வலியுறுத்தியுள்ளது.
The post ஈஸ்டர் தாக்குதல் தொடர்பான அமெரிக்க விசாரணை அறிக்கைகளை அரசு பெற்றுள்ளதா? appeared first on LNW Tamil.
